Orixe e destino: Montefurado – Montefurado / Pasando por O Ermidón e Centeais
Tipo de ruta: Circular / Dificultade: Media / Lonxitude: 15 quilómetros
Desnivel: 400 m / Hora de saída ás 9:00 h. e chegada aproximada sobre as 13.00 h.
Recomendacións: Levar gorra, auga e algo para comer na parada que se fai en Centeais
Ruta en WIKILOC
Para @s que se lle faga complicada ou dura esta opción teremos un “Plan B”. Outra andaina máis suave que transcorre por parte do itinerario da principal pero só serán 7 quilómetros. Nas dúas andainas haberá un responsable e guía da Asoc. Boca do Monte.
A saída da andaina parte da praza de Montefurado, a carón da emblemática Igrexa de Montefurado, de estilo Barroco e construída no ano 1767 polos Sres. de Lamela e Losada.
Saímos de Montefurado polo barrio do Cantón e iniciamos ascenso durante 1 quilómetro polo Camiño de Santiago de Inverno ata chegar aao lugar de O Ermidón. Este itinerario foi oficializado como Camiño de Santiago o pasado ano e cada vez transitan por el máis peregrinos.
Este camiño deixaranos no Ermidón onde comezamos unha subida bastante pronunciada por pista forestal que nos deixa unhas vistas impresionantes de todo o val, cunha panorámica dos poboados de Anguieiros, Covallos, Peites, Vilanuide, A Enciñeira… a vista de paxaro.
No ascenso deixaremos á esquerda a pista que se dirixe ata o poboado de Vilaster. Tras subir uns 3 quilómetros dende O Ermidón, chegamos preto do coñecido como Alto do Cabezo onde tomaremos a pista da dereita xa empezando a ver ao lonxe o lugar de Centeais.
A vexetación pouco a pouco vai facéndose máis frondosa. Aparecen os primeiros castiñeiros e chama a atención tamén a cantidade de sobreiras que por primeira vez dan sombra ó camiño. Entre oliveiras, viñas, hortas, chegamos á aldea de Centeais. No seu centro podemos ver unha igrexa que data do 1718 e os restos da casa reitoral con inscripcións en latín do ano 1779.
Despois de gozar das vistas que hai dende Centeais baixaremos uns catro quilómetros ata chegar á antiga estrada que vai á Rúa e que tomaremos para facer outro tramo do Camiño de Santiago de Inverno que nos leva ata O Muíño. Trátase do barrio máis afastado de Montefurado, onde está o muíño, a carón da vía e encaixado nun cavorco. Alí, o muiñeiro Sr. Casemiro, cunha tremenda vitalidade ós seus 92 años, ensinaranos os restos do muíño, conservado pero non restaurado, onde se moía o cereal para obter fariña.
Seguimos logo o tramo de Camiño de Santiago de Inverno que nos levará ata o punto de partida desta andaina, o centro da aldea de Montefurado. No camiño atopamos un curioso “punto ecolóxico” ideado polo Sr. Casemiro pensando nos peregrinos.
O tramo final levaranos camiñando en paralelo á vía, veremos a estación de tren de Montefurado e o barrio onde se ubica, que nalgún tempo foi un punto comercial importante con comercios de todo tipo. Uns dous quilómetros e xa chegaremos ao punto de partida. Cun pouco de sorte teremos o Centro Social aberto e poderemos tomar un refresco para comentar a xogada e despedirnos.
ALTERNATIVA MÁIS SUAVE
Para os que pensen que se lle pode facer dura esta andaina teremos un “Plan B”. Vén a ser a ruta circular indicada pero evitando a subida a Centeais. Dende O Ermidón collerase a antiga estrada dirección A Rúa e xa baixar polo Camiño de Santiago de Inverno ata o muíño, e desde aquí xa ao punto de partida. Esta opción “liviana” tenun percorrido duns 7 quilómetros. Neste caso, a chegada calcúlase sobre as 11.30-12.00 h.
